ਮਹਿਰਮ ਨੂੰ ਮੁਮਤਾਜ਼ ਬਣਾ ਲੈ ।
ਧੜਕਣ ਦੀ ਆਵਾਜ਼ ਬਣਾ ਲੈ ।

 ਤਾਜ ਮਹਿਲ ਦੇ ਵਾਂਗਰ ਕੋਈ
ਸੁਪਨੀਲੇ ਜਿਹੇ ਰਾਜ਼ ਬਣਾ ਲੈ ।

 ਮਰਮਰ ਦਾ ਇਕ ਬੁੱਤ ਬਣਾ ਕੇ,
ਉਹ ਰੂਹ ਦਾ ਹਮਰਾਜ਼ ਬਣਾ ਲੈ ।

 ਬੋਲਾਂ ਚੋਂ ਸੰਗੀਤ ਝਰੇਗਾ,
ਸਾਹ ਸੁਰ ਕਰਕੇ ਸਾਜ਼ ਬਣਾ ਲੈ ।

 ਬੁੱਲ੍ਹਾਂ 'ਤੇ ਮੁਸਕਾਨਾਂ ਥਿਰਕਣ,
ਦਿਲ ਨੂੰ ਦਰਦ ਨਿਵਾਜ਼ ਬਣਾ ਲੈ ।

 ਖੁਸ਼ੀਆਂ ਪਾਉਣ ਧਮਾਲਾਂ ਜਿਸ 'ਤੇ,
ਚਿਹਰੇ ਦਾ ਅੰਦਾਜ਼ ਬਣਾ ਲੈ ।

 ਸੂਤ ਮੁਹੱਬਤ ਦਾ ਕੱਤ ਕੱਤ ਕੇ,
ਯਾਦਾਂ ਦਾ ਕੁਝ ਦਾਜ ਬਣਾ ਲੈ ।

 ਸਾਰੇ ਅੰਬਰ ਛੂਹ ਸਕਦਾ ਏਂ,
ਸੋਚਾਂ ਦੀ ਪਰਵਾਜ਼ ਬਣਾ ਲੈ