ਐ ਔਰਤ !
ਤੂੰ ਮਹਾਨ ਏਂ 
ਆਪਣੇ ਹਰ ਰੂਪ 'ਚ 
ਤੂੰ ਸਮਰਪਿਤ ਹੈਂ 
ਕਦੇ ਮਾਂ ਬਣਕੇ 
ਕਦੇ ਬੇਟੀ ਬਣਕੇ 
ਕਦੇ ਪਤਨੀ 
ਤੇ ਕਦੇ ਭੈਣ 
ਹਰ ਰੂਪ ਵਿੱਚ ਸਮਰਪਿਤ !
ਪਰ ਤੇਰੀ ਹੋਂਦ 'ਤੇ 
ਪ੍ਰਸ਼੍ਨ ਚਿੰਨ੍ਹ ਕਿਓਂ 
ਕਿਓਂ ਤੇਰੇ ਰਾਹਾਂ 'ਤੇ ਕੰਡੇ 
ਤੇਰੇ ਪੁੰਗਰਨ ਤੋਂ ਪਹਿਲਾਂ ਹੀ 
ਤੈਨੂੰ ਮਸਲ ਦੇਣ ਦੀਆਂ ਸਾਜਿਸ਼ਾਂ 
ਤੇਰੇ ਹਰ ਕਦਮ ਨਾਲ 
ਕਿਓਂ ਜੁੜੇ ਨੇ ਇੱਜ਼ਤਾਂ ਦੇ ਸੁਆਲ
ਕਿਓਂ ਰਹਿ ਗਈ ਬਣਕੇ ਤੂੰ 
ਨੁਮਾਇਸ਼ ਦੀ ਵਸਤੂ 
ਕਿਓਂ ਵਿਸਰ ਗਿਆ ਤੈਨੂੰ 
ਕਿ ਤੂੰ ਹੋ ਸਕਦੀ ਏਂ ਲਕਸ਼ਮੀ ਬਾਈ 
ਤੇ ਮਾਈ ਭਾਗੋ ਵੀ !
ਐ ਔਰਤ !
ਕਿਓਂ ਮੰਨਜੂਰ ਐ ਤੈਨੂੰ 
ਬਣਕੇ ਰਹਿਣਾ 
ਬੱਸ ਮਹਿਜ਼ ਇੱਕ ਜਿਸਮ 
ਤੇ ਭੋਗੇ ਜਾਣ ਦੀ ਵਸਤੂ 
ਕਿਓਂ ਨਹੀ ਦਿਸਦਾ ਤੈਨੂੰ
ਤੇਰੀ ਹੀ ਰੂਹ ਦਾ ਜਲੋਅ 
ਕਿਓਂ ਨਹੀਂ ਕਰ ਸਕਦੀ ਤੂੰ 
ਥੋਥੇ ਸੰਸਕਾਰਾਂ ਦਾ ਕਤਲ 
ਪਰ ਰੋਜ਼ ਕਰਦੀ ਏਂ 
ਕਤਲ ਆਪਣੀ ਰੂਹ ਦਾ
ਜਾਗ ਹੁਣ ਜਾਗਣ ਦੀ ਲੋੜ ਹੈ 
ਆਪਣੀ ਹੋਂਦ ਬਚਾਉਣ ਲਈ 
ਤੈਨੂੰ ਖੁਦ ਹੀ 
ਤਹਿ ਕਰਨੀ ਪੈਣੀ ਹੈ 
ਆਪਣੀ ਆਜ਼ਾਦੀ ਦੀ ਦਿਸ਼ਾ !
ਕਿਸ਼ਾਂਵਲ ਕਰਮਜੀਤ ਕੌਰ